Свет
1. February 2017 - 8:55

Израел ќе гради уште три илјади станбени единици за еврејските доселеници на Западниот Брег

Израел ги објави плановите за изградба на уште три илјади станбени единици за еврејските доселеници на Западниот Брег, што е трета ваква најава во изминатите 11 дена, откако Доналд Трамп стапи на функцијата претседател на САД.

Трамп напомена дека има попозитивен став кон таквите израелски активности во однос на неговиот претходник Барак Обама. 

Во соопштението на изралското Министерство за одбрана се посочува дека целта е да се одговори на барањата за живеалишта. 

Веста беше објавена во пресрет на подготовките за исселување до 8 февруари на 330 доселеници од населеното место Амон на Западниот Брег, откако Врховниот суд утврди дека станбените објекти се градени незаконски на земја, која е приватна палестинска сопственост. 

За 15 февруари во Вашингтон е закажана средба меѓу Трамп и изралескиот премиер Бенјамин Нетанјаху. Портпаролот на Трамп, Шон Спајсер изјави дека двајцата лидери меѓу другото ќе разговараат и за еврејските населби. 

Најавата на Израел минатата недела за изградба на околу 2.500 живеалишта на Западниот Брег предизвика загриженост и кај Палестинците и во Европската унија. Неколку дена претходно израелските власти одобрија изградба на 560 живеалишта во Источен Ерусалим.