Изложба на дела од Борислав Траиковски во КИЦ во Софија

Во Културно-информативниот центар на Република Македонија во Софија вечерва е отворена ликовна изложба на македонскиот ликовен уметник Борислав Траиковски.

На изложбата се претставени 22 портрети работени во различна техника во периодот од 1940 до 1996 година, односно до смртта на авторот.

Изложбата ќе може да се види до 28 октомври, а за отворена ја прогласија директорот на КИЦ на Република Македонија во Софија, Васко Шутаров и директорот на Заводот за заштита на спомениците на културата и Музеј Штип, Зоран Читкушев.

Организатори на изложбата се КИЦ на Република Македонија во Софија и Заводот за заштита на спомениците на културата и Музеј Штип.

Борислав Траиковски е роден во Битола и тој е еден од доајените на македонското ликовно творештво. Има организирано повеќе самостојни изложби во државата, но и во Париз, Лондон, Белград, Загреб, Брадфорд. Во негова чест, Друштвото на ликовни уметници на Битола ја доделува годишната награда „Борислав Траиковски“ за најдобро дело на годишна изложба.