Македонија
7. јуни 2018 - 14:57

Иселениците од САД и годинава ќе обезбедат спасувачи на Дебарско Езеро

Дебарските иселеници во САД и ова лето ќе издвојат финансиски средства за нормално функционирање на спасувачи на вода кои ќе се грижат за безбедноста на капачите на Дебарско Езеро.

Одлука за тоа донесе Управниот одбор на татковинското здружение „Дибра“ со седиште во Њујорк. Одлуката е објавена на веб-страницата на друштвото и во неа стои дека „надгледувањето и безбедноста на граѓаните на плажите на Дебрско Езеро е над се“.

На брегот на Дебарско Езеро, во делот кај градската плажа, каде има и најголема посетеност, по подолг период првпат лани имаше спасувачи благодарение на поддршката на иселениците од САД.

Оваа активност ја реализираат во соработка со Општинската организација на Црвениот крст.

Според секретарот на дебарскиот Црвен крст Исни Телќиу, и годинава ќе бидат ангажирани шест спасувачи на вода, кои располагаат со соодветен сертификат. Тие како и ланското лето ќе бидат лоцирани на две локации на градската плажа, во периодот од први јули до 31 август.

- Ова не би можеле да го реализираме ни лани ни годинава доколку не добиевме поддршка од татковинското друштво „Дибра“ на дебарските иселеници во САД. Тие обезбедија финансиски средства за престојот на спасувачи во текот на летната сезона. Од наша страна пред почетокот на сезоната ќе организираме дополнителна обука за спасувачите, како и обука за давање прва медицинска помош при полесни повредеи, се мисли на исеченици, рече Телќиу.

На брегот на Дебарско Езеро во летниот период дневно има по стотици капачи, а за време на викендите и околу две илјади и функционирањето на спасувачки екипи е неопходност.