Македонија
24. March 2019 - 13:01

Исчистени 300 кубни метри отпад од диви депонии на Јадранската магистрала

Исчистени се приближно 300 кубни метри отпад од диви депонии на потегот од булеварот „Словенија“ кон Момин поток во рамки на седумдневната акција што заврши вчера за генерално чистење на Јадранската магистрала, во скопската населба Визбегово.

Поради поволните временски услови, од ЈП „Комунална Хигиена“-Скопје информираат дека било спроведено и машинско миење со автоцистерна.

Од претпријатието апелираат до стопанските субјекти и угостителските објекти да им помогнат да ја одржат хигиената и чистотата на Јадранската магистрала.

Во реализација на акцијата, секојдневно беа ангажирани 35 работници на ЈП „Комунална хигиена“-Скопје, како и екипи на ЈП „Водовод“, ЈП „Паркови и зеленило“ и ЈП „Улици и патишта“, се наведува во соопштението на ЈП „Комунална хигиена“.