Македонија
18. April 2018 - 9:46

Хан: Решение за името е можно во блиска иднина

- Македонија и Грција можно е во блиска иднина да најдат решение за спорот со името. Двете страни се посветени на овој процес, и тоа на највисоко ниво,  и потребно е да постигнат договор што ќе им служи на интересите и на едната и на другата држава. Ова го порача денеска еврокомесарот за проширување Јоханес Хан, одговарајќи на новинарско прашање дали ЕУ има план „Б“ за Македонија и нејзината евроинтеграција доколку не се постигне решение за спорот. 

- Уверен сум дека е можно да се постигне решение не само затоа што преговорите почнаа и се во тек, туку затоа што добрососедските односи се мошне важни за регионот и за ЕУ, рече Хан откако денеска претходно му го предаде Извештајот на ЕК  на премиерот Зоран Заев во кој Македонија доби чиста препорака за отпочнување на преговорите. 

Нагласи дека од преговарачкиот процес треба да произлезе компромис за кој секоја страна треба да даде нешто за да се постигне конечната цел и да се склучи фер договор.