Македонија
21. April 2016 - 17:27

Груевски:СЈО стана институција под целосна контрола на СДСМ

Очигледно на обвинителите им беше важно единствено постигнувањето на политичкиот и партискиот ефект. СЈО веќе стана институција под целосна контрола на СДСМ и нивен главен инструмент за полички прогон на луѓето од ВМРО-ДПМНЕ, а се со цел рушење на мојот углед и угледот на водството на партијата заради доаѓање на власт на СДСМ, потенцира претседателот на ВМРО - ДПМНЕ Никола Груевски во реакцијата на денешната прес-конференција на Специјалното јавно обвинителство.

Според Груевски, доволно е само да се види реториката на прес- конференциите и, како што стои во реакцијата, малку човек да се запраша и замисли околу доказите, и се е јасно. 

- Како и досегашните прес-конференции, денешната беше со чиста партиска реторика и човек што не знае кој на која функција се наоѓа, веројатно ќе помислеше дека станува збор за една од прес конференциите на СДСМ, на која се обидуваат да не оцрнат и прикажат во негативно светло нас од ВМРО ДПМНЕ, а пред се мене лично како нејзин претседател, без ниту еден единствен доказ, се вели во реакцијата од Груевски.

СДСМ, истакнува тој, не може да дојде на власт по нормален пат, па потребна му е ваква помош.

- Како што досега тоа не им успеа, така нема ни одсега. Во денешната прес конференција неколку пати беше спомнато моето име, како наводен нарачател и очигледно најважно им беше да спомнат дека сум бил аболиран, верувајки дека ќе ме стават во ист кош, со човекот кој сакаат да го донесат на власт, човекот кој тврдеше дека е најприслушкуван во Макеоднија, а за него нема ниту снимка, ниту предмет, ниту истрага од страна на СЈО, господинот Зоран Заев, се подвлекува во реакцијата од лидерот на ВМРО - ДПМНЕ.

Непрофсионализмот на СЈО не е само во политичко партиската наколнетост и ставањето во функција само на една партија, туку, потенцира Груевски, и во неприложувањето на барем еден минимален правен доказ против мене, па макар и измислен.

- Тоа е затоа што имаат предмет во кој нема ниту некаков пропуст, ниту дело, ниту било што незаконско. Ако за некои од другите споменати, извадија смс пораки со одамна починат човек, од кој смс единствено се гледа дека како одговорни луѓе и функционери, во ситуација кога рушењето на Космос беше главна медиумска вест, покажале интерес околу случувањата, за да знаат што да одговорат на многубројните повици од медиумите, за мене не успеале ни такво нешто да пронајдат, појаснува Груевски во реакцијата.

Случајот Космос, според него, е само потврда, дека секој кој прави криминал и има незаконска постапка во оваа држава подлежеше на законот.

- Тоа што некој бил пратеник и богат, не смее да значи дека може да прави што сака, во смисла да го крши законот, а ако некој не е пратеник или е сиромав треба да трпи последици за сторениот прекршок. Пред законот сите се исти и секој треба да ги почитува законите, вели Груевски и додава оти и неколкуте направени вештачења во тоа време недвосмислено покажуваат дека во сучајот Космос има флагрантно кршење на законот, по што следела реакција на одговорните лица во институциите.

Во реакцијата претседателот на ВМРО - ДПМНЕ Никола Груевски оценува дека е жално што СЈО наместо професионална и независна институција каква што сите граѓани очекуваа, се претвори во партиски инструмент на СДСМ, со инквизиторски елементи, и крајно непрофесионално однесување. Тоа, нагласува, ќе ја однесе во сигурен неуспех.