Градоначалникот Марин ја стопира изградбата на зградата кај Мајчин Дом за 15 дена поради констатирани неправилности

По само два дена од почетокот на градежните работи, стопирана изградбата на зградата во зелениот простор до здравствената установа “Мајчин Дом”. Ваквата одлука е резултат на утврдените неправилности во градилиштето од страна на надлежен инспектор, информираат од Општина Аеродром. Велат дека забраната за градење ќе трае најмалку 15 дена.

Првиот човек на општината за во петок закажа вонредна седница на Советот на Општина Аеродром, и ги повика сите заинтересирани страни да учествуваат во изнаоѓање на решение за проблемот.

Од ВМРО ДПМНЕ го обвинуваат градоначалникот Марин дека со својот потпис предизвикал еколошката катастрофа во Аеродром. Освен стопирање на изградбата, тие бараат на вонредната седница да се направи ревизија на ДУП за овој станбен објект.

Почеткот на изградбата на деветокатницата на просторот до “Мајчин Дом” предизвика незадоволство кај граѓаните на Општина Аеродром. Револтирани од уништувањето на зеленилото и неисполнувањето на ветувањето од градоначалникот Марин, дека ќе го повлече планот за изградба на овој објект, стотици жители го блокираа булеварот “Jане Сандански”.