Свет
13. November 2017 - 22:10

Французите им оддадоа почит на жртвите од нападите во Париз пред две години

Со цвеќиња, свеќи и тишина прекината од краток импровизиран концерт на американската група „Иглс оф дед метал“, Франција денеска им оддаде почит на 130-те жртви на нападите во Париз од 13 ноември 2015 година.

Утрото францускиот претседател Емануел Макрон, придружуван од сопругата Брижит и во присуство на својот претходник Франсоа Оланд, им оддаде почит на жртвите од терористичкиот напад пред меморијалната плоча на парискиот стадион Стад де Франс.

Макрон и градоначалничката на Париз, Ана Хидалго, поставија венци од црвени, бели и сини цвеќиња пред спомен плочата посветена на португалскиот имигрант Мануел Дијаз, по што следеше  едноминутно молчење.

Дијаз беше првата жртва на екстремистите на групата Исламска држава (ИД), кои на 13 ноември 2015 година нападнаа неколку париски кафулиња и концертната сала Батаклан.

Оланд, кој во тој период беше претседател на Франција, изјави дека ја слушнал експлозијата на стадионот каде што гледаше фудбалски натпревар, но не избегал за да не пртедизвика паника кај луѓето. За телевизијата „Франс-2“, Оланд рече дека оваа одлука „несомнено спасила живот на многумина".