Финансиска полиција со нова пријава за извршниот директор на Фени

Управата за финансиска полиција денес поднесе кривична пријава против генералниот извршен директор на „Фени индустри“, Јусуф Миракхмедов, за злоупотреба на службена должност и овластување. 

Во двонеделната истрага на документацијата во „Фени“ Финансиската полиција утврдила дека директорот незаконски отуѓувал залихи на фероникел и друга руда од фабриката врз кои банките имале заложно право. Со тоа ги прекршил договорите за кредитирање и направил штета во износ од близу 30 милиони евра.

Истрагата во „Фени“ не е завршена. Дополнително се испитува работењето во фабриката пред август, годинава, и не е исклучена можноста за нови кривични пријави против раководните лица.

Јусуф Миракхмедов ја напуштил Македонија на 29 октомври од аеродромот „Александар Велики“ и сега се очекува јавното обвинителство да побара меѓународна соработка за негово наоѓање. Тој е по потекло од Киргистан, но има холандско државјанство, а во земјава имал дозвола за времен престој.