Македонија
16. September 2019 - 15:12

Европска акција за спречување криминал во Западен Балкан

Во рамки на засилената контрола за борба против нелегална трговија со огнено оружје, нелегална миграција, измама со документи и нелегална трговија со дроги на Западен Балкан на граничните премини Табановце, Блаце и Богородица во земјава се проверени 214.147 лица, возила и простории, а биле уапсени 175 лица. Од нив 23 биле уапсени за време на подготвителната фаза, а 149 во оперативната, соопшти денеска Министерството за внатрешни работи.

Покрај ова, во операцијата Денови на заедничка акција (ДЗА) за Западен Балкан за 2019 година, издадени се 329 одбивања на влез, откриени се 164 тајни влезови, како и 111 пречекорување на дозвола за престој. Во операцијата биле откриени и 14 измами или злоупотреба на визи, 71 фалсификуван документ, како и  54 огнени оружја и 895 парчиња муниција.

Акцијата е дек од ЕМПАКТ програмата (Европска мултидисциплнарна платформа за борба против  закани од криминал), која вклучува нелегална трговија со огнено оружје, нелегална миграција, измама со документи и нелегална трговија со дроги обедини 6.758 полициски службеници, од кои 6.708 теренски и 50 службеници од Оперативниот центар во седиштето на Европол.

-По неколкумесечната подготвителна фаза, во почетокот на месецов се спроведе оперативната фаза на овие меѓународни полициски активности, во која 50 полициски службеници од речиси сите земји членки на ЕУ и земјите од Западен Балкан, Европол, Фронтекс, ИНТЕРПОЛ и ИПА/2017 ги интензивираа проверките во спречување на нелегалната трговија и криумчарење на оружје и муниција, како и на недозволена трговија со дрога и илегална миграција. Врз основа на претходно добиени информации за регионалните трендови и правците на движење на горенаведените видови криминал, издиференцирани беа три гранични премини  на територија на  Северна Македонија,  на кои се вршеа зајакнати контроли на патници и возила –  ГП Табановце/Србија,  ГП Блаце/ Косово, ГП Богородица / Грција, соопшти МВР.

За време на реализацијата на оперативната фаза од акцијата, активностите биле следени и координирани во рамки на двата оперативни штаба, во МВР и во Европол во Хаг, Холандија каде што работеше Оперативниот координативен центар, со претсавници од земјите учеснички во акцијата и од меѓународните организации.

Операцијата беше координирана од ЕМПАКТ програмата, како дел од Политичкиот циклус на ЕУ, четиригодишен план за борба против организиран и сериозен криминал, а резултатите и собраните информации ќе помогнат во тековните и идните истраги заедничко зајакнување на границите на Европа и внатрешната безбедност.

Заради потребата од брза размена на информации во текот на акцијата, односно обезбедувањето на пристап на СМПС и Бирото за врски во Европол до сите расположливи национални бази на податоци, заради вршење на проверки во реално време, целокупната коресподенција со учесничките се одвивала преку Одделението за Европол и користење на СИЕНА апликацијата за брза и безбедна размена на информациите.