Балкан
12. April 2016 - 9:31

Еден загинат и 25 повредени во напад врз жандармерија во југоисточна Турција

Еден војник загинал, а 25 се ранети во напад со автомобил-бомба врз база на жандармеријата во доминантно курдскиот регион Дијарбекир, во југоисточна Турција, пренесоа американските медиуми.

Државната агенција Анадолија информира дека нападот во градот Хани, во округот Дијарбекир, е дело на терористите поврзани со Курдската работничка партија (ПКК).

Настраданите од експлозијата со хеликоптери и возила на брзата помош биле префрлени во воената болница во Дијарбекир.

Приватната агенција Доган, исто така, информира за еден загинат, но според неа во нападот имало 27 ранети лица, а меѓу нив и цивили.

Оштетени биле и зградите во реонот на експлозијата, како и електроводите.