Дресирани кучиња спасија три семејства со осум деца, кои биле повлечени од морските струи во Тиренското море

Обучени кучиња спасија три семејства со осум деца, кои биле повлечени од морските струи и големите бранови на стотина метри од брегот, пишува агенцијата Анса.

Во туристичкото одморалиште Сперлонга, јужно од Рим, на брегот на Тиренското Море, пливачите биле во морето со воздушни душеци и даски за сурфање, кога одеднаш биле одвлечени од брегот со морските струи и високите бранови, не дозволувајќи им да се вратат на безбедно.

Откако повикале помош, биле спасени од обучени кучиња кои неколкупати пливале од брегот до местото каде што биле пливачите и им помогнале да стигнат до безбедниот брег.

Спасувачката операција траеше околу половина час, а драмата на море, од брегот ја гледаа околу 400 луѓе кои, откако сите беа спасени, ги поздравија спасувачките кучиња со голем аплауз.