Македонија
22. April 2016 - 8:43

Договор за соработка на Музејот на современа уметност и Регионалната алијанса на ICOM SEE

Музејот на современа уметност во Скопје и Регионалната алијанса на ICOM SEE денеска ќе потпишат договор за идната соработка на полето на заштитата на културното движно наследство.

Во рамки на денешната завршна едукативна  работилница за реорганизација на депоата  по методологија RE -  ORG  водена од двајца едукатори од ЦИК (Централен институт за конзервација) од Белград  (Вељко Џикиќ и Наталија Ќосиќ) лиценцирани за проектот RE - ORG, излагање ќе имаат организаторите на работилницата, претседателот на Регионалната алијанса ICOM SEE Мила Поповиќ Живанчевиќ и дел од учесниците.

Со овој проект, Музејот се вклучува во меѓународните активности поврзани со сегментот заштита на културното движно наследство преку, кој меѓународниот совет на музеи воспоставува пракса да им помогне на музеите во земјите од Југоисточна Европа. МСУ е првата институција во Македонија која ја спроведува таа соработка.

На работилницата ќе учествуваат по двајца претставници од шест национални музеи од Македонија: Археолошкиот музеј, Природонаучниот музеј, Музејот на македонската борба, Музејот на град Скопје, Националната галерија на Р.Македонија, и Музејот на современата уметност.

Целта на едукативната работилница е преку теоретски и практичен дел да ги воведе учесниците во современите методи и стандарди поставени од ICOM и ICCROM – Рим во доменот на ракување со музејските предмети, создавањето на услови за нивна заштита од несакани дејствија, во протоколот за внесување и изнесување на предметите т.е. делата, во водење на соодветна документација, безбедносни системи....