Димитриев: Период на стабилизиација и фокус на реалните проблеми

Потребен ни е период на стабилизација и фокусирање на реалните проблеми, за вработувања, за подобро образование и здравство, за инвестиции во инфраструктурата и во сите потребни области. И јас сум убеден  дека ние имаме сила да постигнуваме успеси, истакна денеска во новогодишното обраќање претседателот на Владата за спроведување на изборите Емил Димитриев. 

Во Новата година на граѓаните им посакува многу здравје и среќа, бериќет и благосостојба во семејствата, и можости за приватен и професионален развој. - И секогаш имајте верба во вас лично, во вашето семејство, во вашите сограѓани и во нашата татковина Република Македонија, нагласи Димитриев.

Порача да се излечат поуки од годината што изминува.- Годината што измина секој од нас на приватен план ќе ја памети по настани кои оставиле емоција, и добра и помалку добра, лична и семејна, но тие чувства какви и да биле верувам дека ве направиле сите вас посилни. На државен план, годината која изминува ќе остане запаметена по неколку работи, од кои пред се треба да извлечеме поуки, за да бидеме помудри, но и со повеќе верба, за да можеме и во иднина да носиме правилни одлуки, посочи Димитриев. 

Наведува дека за него е најбитно, тоа што и покрај сериозните предизвици со кои се соочуваше Македонија економските политики кои ги спроведуваше Владата дале резултати, можеби, посочува, не во онаа мера во која посакувавме и очекувавме но дека резултати има и тоа никој не би можел да го спори.

- Невработеноста продолжи да се намалува и достигна ниво од 23,5 проценти, кое е сеуште високо и треба да работиме да се намалува, но тоа претставува успех кој е резултат на 10 годишни политики и на многу вложен труд. Се реализираа и политики за понатамошно унапредување на стандардот на населението, и се реализираа проекти кои имаат и директно и индиректно позитивно влијание. Тоа ни дава поука и во следниот период, без разлика на се, како политичари секогаш да бидеме фокусирани пред се на екномијата, и таа да е секогаш наш приоритет од кој не треба да се отргне фокусот ниту во мигови на најголеми предизвици, бидејќи раст и развој на економијата е врвна стратешка определба и врвна обврска пред народот. Кој ќе ја игнорира економијата тој се игнорира себеси, а која работи за економски просперитет тој ќе има почит од народот, истакна Димитриев. 

Тој оцени дека Владата што ја предводел за спроведување на неодамнешните предвремени парламентарни избори успеала да опстане на висината на задачата и подвлече оти квалитетните избори се, пред се, заслуга на народот.

- Во 2016 година, реализиравме и предвремени парламентарни избори, кои беа оценети како фер и демократски од целата меѓународна заедница. Тоа за мене не беше новина, затоа што сум убеден дека сите досегашни избори кои беа спроведени ги задоволуваа демократските стандарди, а препораките за подобрување на изборниот процес секогаш уредно ги адресиравме. Владата за спроведување на изборите која ја предводев, иако функционираше во специфични и невообичаени околности, и се соочуваше со многу проблеми во своето функционирање, сепак успеа да опстане на висината на задачата. Но пред се, квалитетните избори се заслуга на целиот народ, кој покажа дека и денес е, а и во минатото бил свесен и демократски ориентиран, на рамниште на европските народи. Народ кој си ја сака земјата и се грижи за неа, и на кого му се битни националните и државни интереси. Ова ни покажува дека никој подобро и повеќе не може да се грижи за нашите работи отколку што можеме ние самите да се грижиме, укажа Димитриев.

Нам, додава, ни е потребен период на стабилизација и фокусирање на реалните проблеми, за вработувања, за подобро образование и здравство, за инвестиции во инфраструктурата и во сите потребни области. И јас сум убеден  дека ние имаме сила да постигнуваме успеси.

- Политичката влада која треба да биде избрана треба да води сметка за интересот на народот и да ги решава секојдневните проблеми со кои се соочува народот, без алибија, без дефокусирања, без деструкција, туку со многу мудри одлуки, со многу труд  и со посветен и одговорен пристап, со сопствени сили. И пред се со почитување на држвните и национални интереси на Република Македонија, ваква каква што е и за која се залагале и бореле нашите предци и во која треба да живеат во заедништво нашите поколенија, посочи Димитриев. 

Во новогодишното обраќање се осврна и на мигрантската криза со која се соочивме како држава и која е сеуште еден актуелен проблем во светски размери. Посочи дека Република Македонија имаше клучна улога во справувањето со овој глобален феномен и оти тоа беше истакнато од многу светски и европски лидери.

- Тоа го сторивме со помош на нашите пријатели, но пред се потпирајќи се на домашните економски и кадровски ресурси и капацитети, и затоа оваа наша засулга е поголема бидејќи е остварена со сопствени сили. Ова потврдува дека ние имаме капацитети, и дека наместо да се потценуваме, треба реално да ја согледуваме и да си ја вреднуваме нашата улога и позиција, која воопшто не е мала особено во надминувањето на овој предизвик. Ова пак уште повеќе ја покажува потребата и значајноста за членство на Република Македонија во НАТО и во Европската Унија, нешто што е од интерес и на нашата земја но и на европското и евроатланстко семејство, и што ќе значи креација на простор кој подобро ќе се справува со ризици и предизвици, но и подобро ќе ја развива економијата, наведе Димитриев.