Балкан
17. July 2017 - 15:16

Детали за убиството на Закинтос: Починал по 3-тиот удар во глава, му задале вкупно 19

Грчкиот дневен весник „Elefteros Tipos“ објави морничави детали од истрагата за убиството на Американецот Бакари Хендерсон на Закинтос. Група насилници го нападнале момчето и го удриле по глава 19 пати. Починал по третиот удар со нога.

Врз основа на доказите, снимките и изјави на очевидците и осомничените во истрагата, објавено е какви сѐ повреди му биле нанесени на 23-годишниот Американец.

„Примил 19 удари по глава. Главата му изгледала како фудбалска топка, а поголемиот дел од ударите најверојатно му биле нанесени како да изведувале пенал: со жестоки удари со нога. Сигурно починал по вториот или третиот удар“, стои во документите од истрагата.

„Elefteros tipos“ ја објави и изјавата на 21-годишната девојка која била во друштво на Американците и која наводно била причината за расправијата.

Таа вели дека на 7 јули во 2 часот и 30 минути излегла со останатите колеги од барот во кој ги запознала тројцата Американци и со нив пиела пијачки. Со нив бил и Хендерсон, но таа тогаш не знаела како се вика младичот.

„Околу 3 часот ми падна чашата и се наведнав да ја земам. Кога се исправив видов едно лице од српска националност како турка еден од црномурните момци од моето друштво и му удри тупаница. Потоа црномурниот дечко зеде шише и му го удри од глава. Потоа излезе од барот со Американците и по нив тргнаа околу 30-тина Срби кои почнаа да ги тепаат Американците“, стои во нејзината изјава.

„Американците трчаа, а Србите по нив. Јас не тргнав по нив бидејќи добив удар во обид да ги раздвојам. По пет минути дојдов на местото од каде почнаа да трчаат и го видов црномурниот дечко како лежи на улица, во неизвесна состојба, а од очите му излегуваше крв“, рекла 21-годишната девојка од Србија и додала дека „еден од Американците стоеше до него и се обидуваше да му помогне“.

По убиството на Хендерсон беа уапсени девет лица, од кои седум српски државјани. Петмина се задржани во притвор, а двајца се пуштени на слобода со кауција до судењето.

Се товарат за крвично дело Соучество во убиство. Истрагата треба да ги утврди деталите околу степенот на вина и вмешаност во делото и тоа значи дека за секого од нив би можело да биде поднесено различно обвинение за степенот на учество во инцидентот.