Деонин Мејдани ќе биде нов албански амбасадор во Северна Македонија

Нов амбасадор на Република Албанија во Северна Македонија ќе биде Деонин Мејдани.

Мејдани пред членовите на парламентарната комисија за надворешна политика ја презентирал неговата платформа и ја добил поддршката од Комисијата.

-Северна Македонија не е само добар сосед, туку е партнер, сојузник и поддржувач на заедничкото патување во регионалните и евроинтегративните процеси, изјавил, меѓу другото, пред членовите на Комисијата, чиј претседател е Мими Кодели.

На расправа одржана преку онлајн платформата „Зум“, тој нагласил дека еден од неговите приоритети е зајакнувањето на регионалната соработка и унапредување на односите меѓу двете земји.

-Потпишаните договори меѓу двете влади не само што дополнително ги институционализираа нашите односи, туку влијаеја и ќе продолжат значително да влијаат на подобрување и олеснување на животот на нашите граѓани. Соработката треба да ја сметаме за успешна приказна. Со визија и храброст, заеднички се преземаат сериозни реформи. Регионалната соработка ќе биде мој приоритет. Односите меѓу нашите две земји се пример за соработка во регионот и ветувам дека ќе се заложам за унапредување на овие односи понатаму, нагласил тој.

Претходно извршувал функции во албанската администрација, меѓу кои: генерален директор во Министерството за економија, директор за внатрешна контрола во Министерството за правда, директор за мониторинг, контрола и инспекција во Управата за електронска и поштенска контрола, директор на координативен центар против насилен екстремизам.

Мејдани, кој е син на поранешниот албански претседател и познат универзитетски професор, Реџеп Мејдани, доаѓа на местото на амбасадорот Фатос Река.