„Денешниот протест е продолжување на граѓанската непослушност“ - Албанската опозиција ги блокираше сите главни патишта

Албанската централнодесничарска опозиција, предводена од Љуљзим Баша, вчера попладне ги блокираше главните патишта во сите 12 региони на Албанија.

 

Ова е единаесетти пат опозицијата да протестира од февруари, кога опозициските пратеници го напуштија парламентот и се откажаа од своите мандати, барајќи оставка од премиерот Еди Рама, како и формирање преодна влада што би подготвила предвремени избори, јави новинската агенција Анса.

 

„Денешниот протест е продолжување на граѓанската непослушност“, рече Баша, кој одлучи да ги бојкотира и локалните избори на 30 јуни.

 

Тој се закани дека нема да дозволи локалните избори да се одржат на ниту едно избирачко место.

 

Според него, формирањето преодна влада е последната шанса „да се избегне општ судир меѓу народот и нелегалната власт“.

 

Италијанската агенција вели дека албанските власти, сепак, немаат намера да попуштат и дека неколку пати повториле дека локалните избори ќе се одржат на закажаниот датум.

 

Премиерот Рама денес рече дека секој е слободен да одлучи дали ќе учествува на изборите или не.

 

Тој потсети дека албанскиот кривичен закон предвидува екстремно тешки казни за оние што го попречуваат изборниот процес.