Црвен крст: Поради сушата во источна Африка гладуваат над 11 милиони лица

Се потешка суша ги зафаќа африканските земји Сомалија, Етиопија и Кенија и поради тоа над 11 милиони лица гладуваат, соопшти денеска Меѓународната федерација на Црвениот крст и Црвената полумесечина, јави ДПА.

- Ситуацијата во регионот е најтешка од 2011 година кога само во Сомалија загинаа над четвртина милион лица, изјави регионалната директорка на  Меѓународната федерација на Црвениот крст и Црвената полумесечина за Африка Фатумата Нафо-Траоре. 

Според Федерацијата состојбата е најкритична во Сомалија, каде скоро 40 проценти од населението имаат потреба од хуманитарна помош, а во северниот дел веќе се регистрирани смртни случаи. 

Фондацијата „Спасете ги децата“ соопшти, дека десетици илјади Сомалијци ги напушаат нивните домови за да браат храна, вода и пасишта за животните, а камилите умираат. 

Претходно ОН предупреди дека над шест милиони лица во Сомалија ќе се соочат со акутна потреба за храна. 

Според „Спасете ги децата“ околу 71.000 деца веќе страдаат од многу тешка неухранетост и се со „ризик по животот“, а над 360.000 деца под пет годишна возраст страдаат од сериозна неухранетост. 

Во меѓувреме, Кенија страда од големи загуби на добиток, а во Етиопија ефектот на сушата се отежнува од прилов на луѓе кои бегаат од сушата во Сомалија, наведе Меѓународната федерација на Црвениот крст и Црвената полумесечина. 

Федерацијата повика да се соберат вкупно 13 милиони долари за трите земји, но во моментов се обезбедени само 22 проценти од сумата.