Свет
12. December 2015 - 10:37

Чуркин: Русија загрижена поради растот на тензиите во Украина

Русија изрази загриженост поради растот на тензиите во Источна Украина во текот на изминатиот месец и зголеменото присуство на украински сили во овој регион, изјави постојаниот претставник на Руската федерација во ОН Виталиј Чуркин.

Чуркин нагласи дека вооружените сили на Украина продолжуваат да го зголемуваат присуството на своите сили во регионот, дури и без криење на тешкото вооружување, пренесува „Спутник“.

- Не загрижува, а тоа го потврдуваат и набљудувачите на ОБСЕ, тоа што во текот на изминатиот месец тензиите повторно растат. Седумдесет проценти од договорот за прекин на огнот во областа Доњецк важи. Од регионот под контрола на силите на Украина редовно се отвора оган, изјави Чуркин на седница на СБ на ОН.

Само во областа Горловка, според податоците на разузнавачките служби на Доњецк, се распоредени 85 тенкови, 12 оклопни возила и 30 ракетни рампи, истакна рускиот дипломат.