Целосно реновирано најстарото училиште во Велес „Св. Кирил и Методиј“

Заврши реконструкцијата во Основното училиште „Свети Кирил и Методиј“ кое е најстаро во Велес. Во втората  фаза е обновена фасадата на стариот објект и се заменети подовите во 15 училници.

Градежните зафати беа извршени заедно со Министерството за образование и наука. Инвестицијата во оваа фаза изнесува 3,3 милиони денари, кои се дел од проектот „Реконструкција на средни и основни училишта во Република Македонија“. Со вложените 5,9 милиони денари во првата фаза, во реконструкцијата во двете фази заедно се инвестирани речиси 10 милиони денари. 

Градоначалникот на Велес Славчо Чадиев е задоволен од реконструкцијата на училиштето. 

- Прво се изврши рехабилитација на покривот, двете згради на училиштето, подовите, надворешната столарија и фасадата на поновиот објект. Инвестицијата во првата фаза изнесуваше 5,9 милиони денари. Со сегашната инвестиција во реконструкцијата е инвестирано близу 10 милиони денари, информира Чадиев.

Директорката на училиштето Анита Мирчева истакна дека со реконструкцијата, ОУ „Свети Кирил и Методиј“ е меѓу најубавите училишта во Велес, но и во Македонија. 

- Условите за настава сега се одлични. Тоа е голема придобивка за учениците, но и за нас вработените, оцени Мирчева.

ОУ „Св. Кирил и Методиј“ е едно од најстарите училишта во Македонија, осовано во далечната 1857 година и годинава слави 160 години. Во него учеле многу познати велешани меѓу кои и Кочо Рацин.

Истовремено, со средства на Општина Велес извршена е реконструкција во топловодниот систем во училиштето, со што се надминати проблемите со затоплувањето. Монтиран е и нов парен котел со поголема моќност од претходниот.

Во наредниот период преостанува да се уреди и спортската сала. Како што информираше Чадиев, во изминатите четири години Општина Велес самостојно, како и заедно со Министерството за образование и наука, направи реконструкции во сите основни и средни училишта во градот, при што се инвестирани над еден милион евра.