Британски воен авион „без дозвола“ слетал во Ирска

Авион на британското воено воздухопловство (РАФ) слета без дозвола на ирската територија, предизвикувајќи дипломатски инцидент меѓу Велика Британија и Република Ирска, пишуваат медиумите во Даблин.

Авион „Херкулес“ атерирал на аеродромот во Шенон, во западната облест Клер, без да се најави и без претходна авторизација на неговит лет, што ирските власти го означуваат како „сериозен инцидент“.

Инцидентот се случил уште на 29 декември, но дури сега е обелоденет.

Според ирските медиуми, станува збор за „целосно непочитување на ирскиот суверенитет и крајно шокирачка постапка“ од британска страна.

Британските дипломати во Даблин тврдат дека дошло до „прекин во комуникациите“ но Ирците сега бараат разговори со Лондон околу мерките што би спречиле во иднина да се повтори ваков случај.

Од британска страна се дадени уверувања дека станува збор за транспортен авион кој не бил вооружен, не носел оружје или муниција, како и дека не бил во никаква мисија за надгледување и разузнавање.

Официјален Лондон ги уверувал ирските власти дека не станува збор ниту за воена вежба, или за некаква воена операција, туку дека британскиот „Херкулес“ долетал за да наполни гориво.

- Прекршена е процедурата околу давање согласност за вакви летови и за приземјување на авиони, изјави во Даблин ирскиот министер за надворешни работи Чарли Фланеган.

Во текот на 2016 година, имало 21 лет со дозвола за атерирање во Ирска.

Земјата е традиционално воено неутрална, па Ирска е членка на ЕУ, но не е дел од НАТО.

Владата во Даблин има определено посебна процедура околу летовите и спуштањата на странски воени авиони на ирската територија.

Ирски пратеници најавија постапка во Дал (Парламентот на Ирска) со барање аеродромот Шенон да не се користи за вакви летови.