Балкан
30. July 2015 - 10:21

Без дронови и скандали, Албанија сериозно се подготвува за дуел со Србија

Албанија сериозно се подготвува за реванш натпревар на албанската и српската фудбалска репрезентација во рамиките на квалификациите за Европското првенство во 2016 година, јави дописникот на МИА.

Иако натпреварот, кој се оценува како меч од висок ризик, е закажан за 8 октомври, албанскиот премиер Еди Рама уште од сега побарал од раководителите на државните институции чија надлежност е безбедноста на земјата, да ги превземат сите потребни мерки за гарантирање на сигурноста на дуелот.

Рама одржал средба со шефот на албанската тајна служба ШИШ, Вишо Ајази Лика, министерката за одбрана Мими Кодели, првиот полицаец Саимир Тахири и со претседателот на Албанската фудбалска федерација, Армандо Дука.

На средбата станало збор за безбедносните мерки кои треба да се превземат пред, за и по фудбалскиот натпреар Албанија-Србија. Една од темите бил и предлогот продажбата на билетите да биде со лична карта.

Натпреварот ќе се игра на новиот голем стадион „Елбасан Арена“ во Елбасан.

Инаку, српскиот премиер Александар Вучиќ во интервју за германскиот дневен весник „Зидојче Цајтунг“ најави дека ќе присуствува на овој натпревар.

На првиот натпревар меѓу двете репрезентации одржан во Белград, беше предизвикан инцидент откако на стадионот беше пуштен дрон со знамето на Голема Албанија.