Бегај и Рама: Албанија стои покрај грчкиот народ во овој тежок момент

Највисоките претставници на албанската држава, претседателот Бајрам Бегај и премиерот Еди Рама изразија длабоко сочувство за изгубените животи во несреќата во Грција и порачаа дека „Албанија стои покрај грчкиот народ во овој тежок момент“.

-Силно ме погоди трагедијата во Грција, на судирот на два воза, во која има жртви. Искрено сочувство до семејствата на жртвите, додека на преживеаните им посакувам брзо закрепнување. Јас и Албанија стоиме рамо до рамо со грчкиот народ, наведува Бегај.

Премиерот Рама преку објава на Твитер напиша дека „Албанија ја чувствува болката на својот сосед“ и изрази сочувство до семејствата на загинатите.

-Колку е тажно да се слушнеш за изгубени животи и многу повредени во трагичната несреќа синоќа во Грција. Ја чувствуваме болката на нашите драги соседи во ваков тежок час за нивната нација и им се придружуваме во нивните молитви и сочувство до семејствата на оние, кои во оваа несреќа ги загубија животите, напиша Рама на Твитер.

Според последната информација што ја пренесе Топ чанел, во несреќата полесно е повреден еден албански државјанин, кој се наоѓал во последниот вагон на патничкиот воз. Откако му била дадена потребната здравствена услуга, во болницата во Солун, тој бил пуштен на домашно лекување.