Свет
6. December 2017 - 9:40

Американско-јужнокорејски воени вежби близу границата со Северна Кореја

Американски стратегиски бомбардери Б-1 Лансер денеска учествуваа во воени вежби во Јужна Кореја при што бомбардираа цели на воен полигон, стотина километри од границата со Северна Кореја.

САД и Јужна Кореја, како и други нивни сојузници од регионот, спроведуваат големи воени вежби, чија цел е да упатат порака до Северна Кореја по серијата закани и ракетни проби од страна на властите во Пјонгјанг.

За време на воените вежби, американските бомбардери биле придружувани од ловци од типот Ф-22 Раптор, како и јужнокорејски борбени авиони Ф-15 и Ф-16 и вежбале поддршка на копнени сили во борба. Вкупно, над 200 борбени авиони и илјадници војници се ангажирани во вежбаата.

Воените вежби се одржуваат во текот на целата недела.

Северна Кореја минатата недела лансираше ракета со голем дострел, за која тврди дека може да погоди која било цел на територијата на САД, вклучително и главниот град Вашингтон на источниот брег. Северна Кореја има и арсенал на атомски бомби.