Американските воздухопловни власти ќе го затворат воздушниот простор над Кливленд и Филаделфија за партиските конгреси

Американската Федерална управа за авијација во текот на овој месец ќе воведе зони за забранети летови во градовите Кливланд, во сојузната држава Охајо, и во Филаделфија, во сојузната држава Пенсилванија, каде ќе се одржат националните конгреси на Републиканската и на Демократската партија, пренесоа американските медиуми.

На собирите ќе се утврдат претседателските кандидати на двете партии за изборите закажани за 8 ноември, односно Доналд Трамп за републиканците и Хилари Клинтон кај демократите.

На пилотите ќе им биде забрането да навлегуваат во забранетата зона над двата града, со дијаметар од околу 55 километри. Исклучок ќе бидат само воените авиони, леталата на полицијата и авионите и хеликоптерите на здравствените служби, кои, сепак, ќе треба да добијат специјално оодбрение.

На локалните аеродроми ќе се дозволуваат летови на патнички авиони, но само со строго почитување на безбедносните правила на Министерството за транспорт.

Ограничувањата ќе стапат во сила од 17 до 22 јули за регионот на Кливланд и од 25 до 29 јули за регионот на Филаделфија.