Свет
26. јуни 2017 - 14:21

Затворениот кинески нобеловец ослободен поради „неизлечива болест“

Кинескиот нобеловец Лиу Ксиаобо (61) е ослободен од затвор, откако лекарите утврдиле дека е болен од рак на црниот дроб, објави хонгконшкиот весник „Саут Чајна Морнинг Пост“ повикувајќи се на изјава на братот на уапсениот.

Според изјавата на братот, заболениот нобеловец, веднаш по ослободувањето, бил префрлен на болничко лекување.

Лиу е добитник на Нобеловата награда за мир, за својата долгогодишна кампања за човековите права.

Во 2009 година тој беше уапсен, а потоа и осуден за „субверзивни активности“ против Народна Република Кина, затоа што повикуваше за поголема демократија во земјата.

Неговата сопруга е ставена во домашен притвор и не смее слободно да се движи, откако Лиу во 2010 година ја доби Нобеловата награда.

Лиу Ксиаобо е еден од клучнте лидери на протестите на пекиншкиот плоштад „Тиананмен“ во 1989 година.

По случувањата на плоштадот, на Лиу му беше понуден азил во Амбасадата на Австралија во Пекинг, но тој одлучи, сепак, да остане во Кина и да продолжи со кампањата за повеќе демократија и за почитување на човековите слободи.

После седум години забрана за слободно движење, кинеските власти се уште немаат дадено никакво објаснување, зашто сопругата на нобеловецот Лиу се наоѓа во домашен притвор.