Бизнис
26. јуни 2017 - 16:36

ВМРО-ДПМНЕ: Со скалест данок СДСМ ги брка инвеститорите

ВМРО-ДПМНЕ смета дека со зголемувањето на даноците СДСМ удира по џебот на граѓаните и има намера да ги избрка странските инвеститори, но исто така да влијае неповолно на домашните инвеститори.

Христијан Мицковски член на ИК во оваа партија денеска на прес-конференција рече дека ВМРО-ДПМНЕ силно ќе се спротивставувa на планот на СДС да ја менува даночната политика, односно да ги зголеми даноците во Република Македонија.

- Министерот предложен во Владата од страна на СДС господинот Тевдовски со најавата дека ќе ги зголеми даноците врши силен негативен удар врз економијата во нашата држава, но и директно удира по џебот на граѓаните. Програмата на Владата предводена од СДС вели дека ќе се воведе персонален данок на доход со две променливи стапки од 10 отсто и 18 отсто. За волја на вистината СДС сакаат да го зголемат данокот за граѓаните и бизнис заедницата за цели 80 отсто, рече Мицковски.

Како што додаде од ВМРО-ДПМНЕ сакаат да предупредат и да изразат загриженост дека оваа анти-реформа при која ќе се зголемат даноците ќе ја врати Република Македонија 20 години наназад. - Да потсетиме дека во минатото СДС и пред 2006-тата година имаа неуспешни обиди за зголемување на даноците со променлива стапки од 15, 18 и 24 отсто, кои се покажаа како кобни и ја втурнаа во пропаст македонската економија, рече Мицковски.

Додаде дека зголемувањето на даноците ќе значи сериозен удар врз приватниот сектор  без разлика на домашните и странските компании. - Од оваа анти-реформа никој ништо не добива, а сите губат. Ќе се намали интересот за инвестирање во државата, ќе паднеме длабоко на дното на листата на Дуинг Бизнис, домашните компании ќе бидат неконкурентни поради зголемените трошоци па ќе бидат принудени да ги намалат инвестициите, а со тоа и бројот на ефективни работни места, истакна Мицковски.

Според него сето ова ќе резултира со енормно намален економски раст, ќе се зголеми невработеноста и ќе има прекин на отворањето нови работни места, а најважно ќе царува даночната евазија и ќе се врати сивата економија како пред 2006тата.

Мицковски истакна дека како држава, ќе станеме неатрактивни за водење бизнис.

- Во моментов, потенцира, благодарение на отворените политики на Владата која беше предводена од страна на ВМРО-ДПМНЕ, Република Македонија има најниски даноци во светот, со ефективна даночна стапка од 7,4 отсто. Во 2006-тата имајќи ја предвид неуспешната и погубна даночна политика на високи даноци на СДС, ги намаливме даноците и воведовме единствена стапка од 10 проценти персонален данок на доход и данок на добивка. Исклучително задоволни беа граѓаните но и бизнис заедницата бидејќи плаќањето даноци се поедностави во однос на пресметката и малите трошоци за фирмите.ж

Мицковски смета дека граѓаните не очекуваат зголемени даноци , туку дека граѓаните очекуваат реализирање на ветувањата кои СДС ги даде пред изборната кампања, како 16.000 денари минимална плата, 30.000 денари просечна плата, нови 64 000 работни места, нови 500 км автопат, нови електроенергетски објекти, 100.000 денари плата за докторите и така натаму.