Свет
13. September 2017 - 10:03

Вашингтон бара „Раша тудеј“ да ги појасни своите активности во САД

Американското Министерство за правда побара од руската телевизија „Раша тудеј“ (РТ) да го почитува законот со кој сите странски државни организации се обврзани пред властите во САД да ги образложат нивните дејности и активности. 

Претставничката на РТ, Ана Белкина наведе дека американското дописништво на руската телевизија добило писмо од Министерството за правда на САД, со кое се информира телевизијата дека треба да ги почитува обврските од законот за регистрација на странски организации во земјата. 

Тој закон е усвоен во 1938 година, со цел да бидат идентификувани изворите на нацистичката пропаганда во САД. 

Законот ги обврзува сите организации чии сопственици се странски земји, да ги образложат своите дејностите пред властите. 

- „Раша тудеј“ ги консултира адвокатите кои го разгледуваат барањето, додаде Белкина. 

Главната уредничка на РТ, Маргарита Симонијан ја објави соопштение на сајтот на телевизијата во кое се осудува барањето на американското Министерство за правда и се истакна дека тоа претставува доказ за „војната“ што ја водат САД против руските медиуми. 

Вашингтон, често ја обвинува „Раша тудеј“ дека е пропаганден орган на Кремљ.