Македонија
22. September 2017 - 10:41

Тридневен хуманитарен настан „Јас сум Цако“

Проекција на филмови, панел дискусии и лични изјави на млади и успешни лица со попреченост ќе бидат дел од тридневниот хуманитарен настан „Јас сум Цако“ што го организира Александар Матовски-Цако, грантист на проектот за граѓанско учество на УСАИД и добитник на наградата за младинско учество за 2016 година.

Александар Матовски – Цако е млад поет и активист, кој наградата за извонреден придонес за младинско учество во категоријата поединци ја доби за неговиот ангажман во општеството во насока на подобрува социјалниот статус на лицата со попреченост.

На вчерашната промоција на настанот во „Јавна соба“, присутните имаа можност да ја проследат проекцијата на филмот „Чија е оваа песна“, како и да чујат повеќе за улогата на медиумите во секојдневното живеење на лицата со попреченост. Во неформалниот дел на настанот, присутните уживаа во разни музички изведби.

Хуманитарниот настан „Јас сум Цако“ ќе трае до 23 септември, а деновите ќе бидат посветени на образование, култура, поезија, танц, спорт, музика и изложби.

Проектот за граѓанско учество на УСАИД е петгодишен проект кој има за цел да се јакнат капацитетите на граѓанските организации и младински групи за да се унапредуваат јавните политики, да се подобруваат јавните услуги, да се промовира доброто управување и да се придонесе за подобрување на животниот стандард во Македонија.

Наградата за младинско учество има за цел да се оддаде признание и да се прослави работата на млади поединци и неформални групи кои со своето дејствување имаат покажано посветеност, која служи за пример во однос на подобрувањето на животот во нивните заедници и општеството, во целина.