Свет
30. September 2016 - 13:24

СЗО: Приближно 340 лица убиени во источно Алепо во последните неколку недели

Во последните неколку недели приближно 340 лица се убиени во борбите во источниот дел на северниот сириски град Алепо, информира денеска Светската здравствена организација (СЗО), цитирана од британските медиуми.

-Во борбите меѓу владините сили и нивните сојузници, од една страна, и бунтовниците и исламистите, од друга, загинаа 338 лица, меѓу кои 106 деца. Во судирите, исто така, се ранети и 846 лица, вклучувајќи и 261 малолетници, изјави високо позициониран претставник на СЗО.

Тој побара да се прекине со убиствата и нападите врз медицинскиот персонал и болниците, како да се даде можност за евакуирање на ранетите и за доставување хуманитарна помош до населението.

Источен Алепо е контролиран од бунтовниците. Пред една недела владините сили почнаа копнена офанзива за преземање на овој дел од градот.