Македонија
22. September 2016 - 13:50

Судот бара дополнителни документи од СЈО за седум осомничени од УБК

Судијата кој треба да постапи по обвинителниот предлог во скратена постапка против Г.Г. и други лица осомничени лица за кривичното дело „Фалсификување службена исправа“ поднесен од Специјалното јавно обвинителство, со допис ги врати доставените докази во прилог на обвинителниот предлог на СЈО, информираат денеска од скопскиот Кривичен суд.

- Со цел задржување на навременото и транспарентното работење на овој Суд, а во врска со преземањето на одредени дејствија на судиите за предмети кои деновиве се во фокусот на вниманието на јавноста, Основен суд Скопје 1 - Скопје информира дека судијата кој треба да постапи по обвинителниот предлог во скратена постапка против Г.Г. и други лица осомничени лица за кривичното дело „Фалсификување службена исправа“ од чл.361 ст.2 в.в. со ст.1 в.в. со чл.22 од КЗ, поднесен од страна на Специјалното јавно обвинителство за гонење на кривични дела поврзани и кои произлегуваат од содржината на незаконското следење на комуникациите (СЈО), со допис ги врати доставените докази во прилог на обвинителниот предлог на СЈО, стои во соопштението од Судот.

Во дописот, како што велат од Судот, се наведува дека во прилог на доставениот обвинителен предлог против осомничените лица, доставена е и листа на докази и попис на списи со приемница. - Меѓутоа од содржината на пописот не произлегува дека е доставен акт за декласификација на доказите за потребите на судската постапка врз основа на кој класифицираните докази може да се користат во постапката, односно да може да се оцени основаноста на обвинението, со оглед на тоа што без ваков акт, истите не може да бидат користени од страна на судската служба, за оформување на списите на предметот, посочуваат од Судот.