Свет
7. April 2016 - 14:40

Суданскиот претседател најави повлекување од власта во 2020 година

Суданскиот претседател Омар ал Башар изјави дека ќе се повлече од функцијата во 2020 година, кога ќе му заврши сегашниот мандат.

Башар е на власт уште од 1989 година, а последен пат беше избран за претседател во април минатата година.

- Оваа работа, како претседател веќе ме исцрпува, затоа сегашниот мандат е мојот последен, изјави Башар во разговор за Би-Би-Си.

Неговите политички противници и критичари не веруваат во уверувањата дадени за британскиот медиум, за тоа дека во 2020 година „друг ќе биде претседател на Судан“, затоа што во изминатите години, на повеќепати имало такви изјави за негово повлекување.

На минатогодишните избори тој освои 94 отсто од гласовите, но суданската опозиција го бојкотираше гласањето, обвинувајќи ја власта за спроведување на нечесни и неслободни избори.

Башар е професионален војник кој учествуваше во арапско-израелската војна во 1973 година. Во 1989 година изврши воен удар и ја презеде власта во Судан, а во 90-те му даде азил на лидерот на терористичката мрежа на Ал Каеда, Осама бин Ладен.

Тој е првиот претседател во светот кој е обвинет за геноцид и за воени злосторства од Меѓународниот кривичен суд (ИЦЦ), за војната што суданската армија ја води во провинцијата Дарфур.

Според ОН, од 2003 година, во оваа со војна зафатена суданска провинција присилно се раселени преку 2,5 милиони луѓе, а само оваа години, се раселени уште нови 100 илјади лица.

Омар ал Башар ги отфрла сите обвинувања дека е извршен геноцид, но во јануари годинава одново беше извршено бомбардирање во Дарфур, по што властите во Картум побараа од провинцијата да се повлечат мировниците на ОН и хуманитарните организации.