Родителите на деца со посебни потреби ги поставија шаторите пред Собрание

Стојановска Сузана е невработена и самохран родител на шестооделенецот Никола кој има Даунов синдром. Живеат под кирија и вели дека целокупната грижа за своето дете со посебни потреби е на нејзини плеќи. После училиште мора да го чува дома бидејќи нема дневни центри за деца со ваква состојба. Револтирана од незаинтересираноста на институциите, две вечери со Никола ќе спијат во шатор во паркот Жена борец.

Треба дефектолог, социолог, физикални вежби. Но нема од каде. Еден час на дефектолог е 600 денари а јас немам пари, вели Сузана Стојановска мајка на дете со посебни потреби.

Сузана е една од многуте родители кои оваа вечер ќе ја преспијат во паркот се со цел да го привлечат вниманието на јавноста да слушне за нивните проблеми. Еден татко се пожали дека две децении води правна битка со институциите и никако да дојде до решение за згрижвање на неговата ќерка.

-33 години, толку е оваа моја ќерка, 33 години никој не тропнал на врата да праша како живееме и како се снаоѓаме јас и мојата сопруга, вели татко на дете со посебни потреби.

Покрај рана дијагностика, современа терапија, стручен кадар и дневни центри, родителите бараат и обезбедување иднина на децата по нивната смрт.

- Денеска кампуваме токму овде пред совеста на оние кои можат нешто да направат за нас и физички да не видат и слушнат. Има закони кои гарантираат права за нашите деца, а некои од нив за жал се само на хартија, изјави Зоран  Мијалков, родител на дете со посебни потреби.

Министерот за труд и социјална политика ги посети родителите во паркот и им вети дека дел од барањата можат да бидат реализирани.

--Како прв човек на Министерството имаат подадена рака од мене. Барањата, оние кошто првично ги видов во делот на законските измени им ветувам дека ќе ги разгледаме и најголем дел од барањата се прифатливи, изјави Ибрахим Ибрахими министер за труд и социјална политика.

И да бидат направени законските измени кои се дел од барањата, родителите мора да чекаат да биде формирано Собранието.

Од 20 до 22 секој месец, родители и деца со посебни потреби ќе кампуваат овде се до исполнување на нивните барања.