Македонија
11. May 2016 - 22:15

Протести на граѓанската иницијатива „Протестирам“ во Скопје и други градови

Во организација на граѓанската иницијатива „Протестирам“ и денеска се одржа протест во Скопје и во повеќе градови низ државата.

Учесниците на протестите побараа повлекување на одлуката за аболиција за сите оние против кои се води истрага и против кои е покренато обвинение од Специјалното јавно обвинителство (СЈО) и неотповиклива оставка од претседателот Ѓорге Иванов.

Протестот во Скопје почна пред Специјалното јавно обвинителство по што учесниците се упатија кон резиденцијата на претседателот Иванов на Водно, но беа спречени од полициски кордон. По говорите што се одржаа во близина на резиденцијата на претседателот Иванов и по бојадисувањето на негов портрет, учесниците на протестот се разотидоа. На пат кон резиденцијата беа обоени автобуските станици.

Протести беа организирани и во Струга, Ресен, Тетово, Куманово, Велес и Битола од каде граѓаните исто така побараа повлекување на одлуката за аболиција и одложување на изборите на 5 јуни.