Прилепските студенти ќе се вклучат во граѓанскиот парламент и во Економско-социјалниот совет

Прилепските студенти ќе учествуваат во Граѓанскиот парламент и во Економско-социјалниот совет, а квалитетните студенти кои имаат финансиски проблеми ќе бидат поддржани од локалната самоуправа и од градоначалникот.

 

Тоа беше договорено на денешната средба на студентите од Прилеп од организацијата  AIESEC, кои студираат на Економскиот факултет во Прилеп и на универзитетите во Македонија, со градоначалникот Илија Јованоски, која тој ја иницираше по повод меѓународниот ден на студентот.

 

Според Јованоски, студентите се иднината на Прилеп и на државата. Рече дека ги слушнал нивните барања и се надева, рече, дека  комуникација и дружењето ќе продолжат.

 

- Ја имаат мојата несебична помош на сите нивоа за нивните иницијативи и на овие нивоа со нивно вклучување во активностите  со Граѓанскиот парламент и Економско-социјалниот совет ќе може да се потврди тоа што велиме дека се нашата иднина, рече Јованоски.

 

Студентот на Правниот факултет во Битола Димитар Врглески рече дека имаат повеќе активности и проекти и наидоа на разбирање кај градоначалникот Јованоски за помош, особено во логистичката поддршка и можноста за практицирање на наученото.

 

- AIESEC е организација која работи на повеќе проекти за вклучување на младите во општествениот живот, за зајакнување на нивните меки вештини, а општината би ни помогнала со обучувачи, со логистичка поддршка како и практичната работа која на студентите им е повеќе од потребна. На средбата таа беше посебно нагласена, како и услови за студентите кои се определуваат во уметничките дејности. Јас како студент на Павниот факултет во Битола немам практика и затоа ми е посебно битно тоа, рече Врглески.

 

Ивана Сурлаџиоска, студент на Економскиот факултет во Прилеп, рече дека имаат практика во фирми, но тоа не е доволно.

 

- Имаме практична настава која треба да ја реализираме во траење од еден месец,  најчесто тоа е во фирмите, но како студенти се соочуваме со проблемот колку ефектно се извршува таа практика, колку ни се дава можноста да покажеме што сме научиле и што умееме. Затоа прашање е колку ние студентите сме научиле од практиката што може да ни помогне при идното вработување. Затоа, вклучувањето во повеќе сегменти од општественото живеење во градот и помошта на градоначалникот во идна соработка е многу значајна за нас, истакна Сурлаџиоска.