Македонија
21. July 2017 - 12:51

Претеничка група на ВМРО-ДПМНЕ: Потребен е договор со Бугарија кој ќе решава проблеми, а не да создава нови

Пратеничката група на ВМРО-ДПМНЕ смета дека договорот за добрососедство со Бугарија, што треба да се потпише на 2 август, ќе биде асиметричен и во корист на Бугарија ако во него не се вметнат забелешките што ги дале на затворената седница на која се разгледуваше.

- Нацрт договорот за кој што вчера Министерот за надворешни работи Никола Димитров рече дека не бил штетен за Република Македонија предизвика сериозна загриженост кај нас. Откако имавме увид во нацрт договорот за добрососедство како пратеници дадовме пет забелешки кои што сметаме дека се од суштинско значење за овој договор. Доколку овој нацрт договор остане непроменет, како пратеници од ВМРО-ДПМНЕ ќе сметаме дека зборовите за консензус за стратешки прашања и инклузивност со опозицијата се само обичен театар за замајување на јавноста и потенцираме дека одговорноста за штетните одлуки ќе биде само врз Зоран Заев, Никола Димитров и СДСМ. Ние нема да даваме алиби на завршени работи за кои со нашиот збор не се менува ништо, соопшти пратеничката група на ВМРО-ДПМНЕ.

Пратениците од ВМРО-ДПМНЕ, се потенцира во соопштението, сакаат квалитетен и добар договор и за Република Бугарија и за Република Македонија.

- Потребен е договор кој ќе решава проблеми и ќе создаде подобра иднина, а не договор кој ќе создава нови проблеми на нашиот пат кон ЕУ и НАТО. Ако договорот е добар, како што тврдат Заев и Димитров, нека го објават веднаш. Граѓаните ќе ги поздрават и ќе им дадат поддршка. Од што се плашат? Дали Заев и Димитров се и самите свесни дека ќе потпишат договор кој што е штетен за државата и граѓаните па затоа тој договор упорно се крие од јавноста? Договорот што го спремаат Димитров и Заев ќе биде добар само за Бугарија, а многу штетен за Македонија. Затоа во Бугарија политичарите се фалат со него, а затоа во Македонија тој се крие од јавноста, се потенцира во соопштението.

Се потсетува дека премиерот Заев и ним и на целата јавност и соопшти дека договорот може да претрпи промени пред потпишувањето, но, се додава во соопштението, министерката за надворешни работи на Бугарија соопшти дека договорот е веќе затворен.

- Прашуваме кој лаже. Зоран Заев во македонското Собрание или госпоѓа Захариева пред бугарската јавност? Сметаме дека македонскиот народ како засебен и конститутитвен народ во Република Македонија мора да биде споменат во овој договор. Околу македонскиот јазик сметаме дека треба да биде споменат како јазик со своја посебност, независно од неговото спомнување во Уставот на Република Македонија. Мора да се почитува членот 49 од Уставот на Република Македонија кој што ја предвидува уставна обврска на државата да се грижи за Македонците надвор од држвата. Предложивме фразата „заедничка историја“ да биде заменета со нова поширока фраза каде што ќе бидат истакнати и дел од заедничката регионална балканска историја и дел од посебните истории на Македонија и Бугарија и на македонскиот и на бугарскиот народ. Последна и суштинска забелешка која што ја дадовме по однос на овој договор се однесуваше на забележителната асиметрија на правата и обврските на двете договорни страни во договорот, а на штета на Република Македонија, се вели во соопштението од пратеничката група од ВМРО-ДПМНЕ.

Се нагласува дека историјата на Македонија, но уште повеќе нејзината иднина не и припаѓа само на СДСМ, Заев и Димитров, туку на сите граѓани.

- Затоа договорот треба да се види пред да се потпише. Откако ќе се потпише тој е завршена работа, потоа Собранието на Република Македонија не може да го менува, нема такви уставни надлежности. Дебатите и дискусиите на оваа тема откако ќе биде потпишан овој договор нема да бидат од корист бидејќи Република Македонија веќе ќе мора да го почитува тоа што е потпишано како договор. За Република Македонија како држава ќе биде пораз доколку биде потпишан текст каде што не се признава македонскиот народ како засебен и конститутивен народ во Република Македонија. Македонија мора да чекори кон ЕУ и НАТО врз база на европски цивилизациски вредности. Балканските средновековни аспирации се само тегоба за целиот регион. Македонија не смее да биде нивна жртва, се истакнува во соопштението од претеничката група на ВМРО-ДПМНЕ.