Попоски во Стразбур по повод 20 години од пристапувањето на РМ во Советот на Европа
Министерот за надворешни работи Никола Попоски денеска престојуваше во работна посета на Советот на Европа, најстарата европска организација со седиште во Стразбур, по повод јубилејот 20 години од пристапувањето на Република Македонија кон Советот на Европа.
Како што соопшти МНР, во рамките на посетата, министерот Попоски се сретна со генералниот секретар на Советот, Торбјорн Јагланд при што ја истакна определбата на Република Македонија за доследна примена на Европската конвенција за човекови права како и на сите европски стандарди во поглед на човековите права, демократијата и владеењето на правото во Република Македонија.
На средбата беше искажано задоволство од придонесот на Организацијата во изминатите дваесет години во демократскиот развој на земјата, како и од континуираната соработка на овој план.
Од своја страна, генералниот секретар се заблагодари за придонесот на Република Македонија не само во примената, туку и во подготовката на новите стандарди и инструменти за заштита и унапредување на човековите права на Европскиот континент. Генералниот секретар покажа интерес и за тековните политички состојби во земјата, како и за ситуацијата со бегалците и мигрантите.
На средбата со претседателот на Европскиот суд за човекови права судијата Гвидо Раимонди, соговорниците го истакнаа примарното место и улогата на Судот во европската архитектура за заштита на човековите права. Министерот Попоски ја реафирмира поддршката на реформата на Судот и заложбата за целосна имплементација на неговите пресуди од страна на Република Македонија.
Во рамките на посетата, министерот Попоски учествуваше и на свечениот прием организиран по повод значајниот јубилеј. Во своето обраќање министерот Попоски истакна дека Република Македонија ја одбележува годишнината со решеност да биде активен учесник во креирањето на новите и унапредувањето на постоечките стандарди во областа на демократијата, човековите права и владеењето на правото, што е од особена важност во контекст на пристапувањето на Република Македонија кон Европската Унија.
Ново на Сител
-
В недела евакуација на жителите на Ниш поради неутрализирање бомба останата од бомбардирањето на НАТО
-
Продолжува периодот на променливо облачно време со повремени локални врнежи од дожд
-
За еден месец изгорени над 400 хектари шума во Националниот парк Шар Планина
-
Во март зголемени потрошувачките, станбените, автомобилските и кредитите на тековните сметки
-
Приведен 20-годишник кој бил баран со потерница поради бегство од Затворот Гевгелија
-
Боки 13 бара повторено судење за „Рекет“ - има докази со кои ќе покаже каде завршиле парите од чантата Луј Витон
-
Советот НАТО-Украина ќе одржи вонреден состанок за противвоздушната одбрана на Киев
-
Спречен нов атентат врз Зеленски, уапсен Полјак кој соработувал со Русите