По 41-ви пат „Меморијал-Чајка“

Одбојкарска Федерација и семејството Хаџи-Иљоски, со поддршка од Агенцијата за млади и спорт, 41-ви пат ќе го организираат турнирот во одбојка „Бранко Хаџи Иљоски-Чајка”, турнир со најголема одбојкарска традиција во Македонија.

 

На прес-конференцијата свое обраќање имаше директорот на Агенцијата за млади и спорт Дарко Каевски, кој ја истакна потребата од континуирано одржување на манифестации со долгогодишни традиции.

 

„Овој турнир е празник за одбојката во Македонија и градот Тетово. Традицијата на одржување на овој меѓународен настан на одбојката трае од 1975 година, и е една од најстарите манифестации во Македонија“, истакна Каевски.

 

Претседателот на организациониот одбор на турнирот, Ивица Хаџи-Иљоски се зблагодари за поддршката на Агенцијата за млади и спорт, како и за медиумската покриеност на настанот, поканувајќи ги сите вљубеници на одбојката да бидат дел од овој одбојкарски спектакл во Тетово.

 

„Политиката на турнирот е во секоја година да промовираме посебни групи, како младински или женска тимови, репрезентации, а оваа година акцент ставаме на машката сениорска одбојка. Од таа причина, покрај ОК Вардар, Универзитетски тим Тетово, ОК Лешок, наши гости ќе бидат и ОК Партизан од Белград“, истакна Хаџи-Иљоски.

 

Натпреварите ќе се играат во салата „Млади” во Тетово, на 16 и 17 декември.