Македонија
18. January 2017 - 14:16

„Пивтијада 2017“ во Крива Паланка

Околу 7.000 пивтии се приготвени за манифестацијата „Пивтијада 2017“ која осма година по ред ја организира локалната самоуправа на општина Крива Паланка на големиот христијански празник Богојавление - Водици.

Пивтиите ги подготвија учениците од угостителската паралелка на средното општинско училиште „Ѓорче Петров“.
 
- Општината обезбеди околу 150 килограми месо за подготовка на пивтиите. Заедно со учениците два дена готвиме во народната кујна при домот за ученици „Боро Менков“. Утре изутрина ќе финишира постапката и за настанот ќе има 90 порции или околу 7.000 парчиња вкусни пивтии, приготвени по традиционален рецепт од ова поднебје, изјави професорот Дане Петровски од СОУ „Ѓорче Петров“.
 
Во процесот на подготовка беа вклучени учениците од завршната трета година од угостителската струка.
 
„Пивтијада 2017“ ќе се одржи на централниот градски плоштад во Крива Паланка, по одбележувањето на Богојавленскиот водосвет, фрлањето на крстот во водите на Крива Река.