Одложени судските рочишта за „Траекторија“ и насилствата во општина Центар

Специјалното јавно обвинителство поседува 315 прислушувани телефонски разговори и смс пораки како доказ за предметот Траекторија, но за да не бидат злоупотребени тие не им се доставени ниту на адвокатите ниту на обвинетите. СЈО се сомнева дека обвинетите можат да ги копираат или премонтираат аудио снимките и од тие причини овие докази му се доставени единствено на судот. Адвокатите бараат увид во прислушуваните разговори со цел да подготват квалитетна одбрана, но дали судот ќе го прифати нивното барање ќе се знае на следното рочиште закажано за 26 декември. Според екс-премиерот Груевски кој е еден од обвинетите во предметот Траекторија, ваквото признание на Специјалното обвинителство отвара сомнеж дека телефонските разговори се веќе монтирани.  

Груевски попладнево седна на обвинителна клупа и за насилните протести во општина Центар, но судењето се одложи бидејќи судот немаше техничка можност за аудио и визуелно снимање. Двете рочишта закажани во ист ден, според Груевски е очигледен притисок врз судството за прогон на функционери на ВМРО-ДПМНЕ.

Поранешниот градоначалник на општина Центар Андреј Жерновски кој на денешното рочиште требаше да одговара на прашања на адвокатите, обвини за намерно одложување на судскиот процес.

Судскиот процес за насилните протести пред општина Центар во 2013-та продолжува на 27 декември. Во овој предмет двајца обвинети веќе признаа вина и добија условни затворски казни.