Македонија
23. March 2017 - 8:36

На бесплатна бања и викенд ќе одат 43 пензионери од дебарско

Правото на бесплатна бањско-климатска рекреација и туристички викенд, годинава ќе го користат 43 пензионери од општините Дебар и Центар Жупа.

- Од нив 37 пензионери го оствариле правото на бесплатна бањско климатска рекреација, а шестмина бесплатен туристички викенд. Правото на бесплатна бања ќе го користат во познатите по својата лековитост „Дебарски Бањи-Цапа“, додека бесплатниот викенд во некој од хотелите покрај брегот на Охридско и Преспанско Езеро, вели Бардул Баланца, референт во дебарската Деловна единица на Фондот за пензиско и инвалидско осигурување, која со својата актвност ја покрива и  општина Центар Жупа.

Според Баланца, во периодот март- јуни пензионерите ќе одат на бања додека март-мај оние кои го оствариле правото на бесплатен туристички викенд.

Поволностите од овој владин проект досега ги искористиле над 360 пензионери од општините Дебар и Центар Жупа.

- Најголемиот број од нив или 340 биле на бесплатна бањско климатска рекреација, проект кој се спроведува од 2010 година, додека бесплатниот туристички викенд, како дел од владиниот проект, во изминатите две години, го искористиле 44 пензионери од двете општини и сите тие се многу задоволни од овој Владин проект,-посочува Баланца.

Во двете општини има над две илјади пензионери, од кои над 400 во општина Центар Жупа.