Македонија
27. April 2016 - 20:36

Мирен протест на ГДОМ во Кавадарци

„Кавадарци сака избори на петти јуни и прогрес, како и крај на поделбите во Македонија“, „И земјоделците ја поддржуваат одлуката за избори, повикувајќи на мир и напредок во државата“, „Кавадарци е град на лозарите, а не на хулиганите“, беа само дел од транспарентите на вечерашниот мирен протест во Кавадарци за поддршка на ГДОМ.

За време на протестот, кој се одржа втор пат, во паркчето кај полицијата, од разглас беа пуштани македонски револуционерни песни. 

Пред присутните се обрати градоначалникот на Кавадарци Александар Панов. Тој јавно истакна жалење поради, како што рече, сквернавењето на комуналните и јавните објекти од  страна на СДСМ.

- Намерно велам СДСМ, зашто во Кавадарци нема таква невладина организација или е толку мала што е невидлива, така што зад она што се случуваше денес во нашите детски градинки, на градскиот плоштад и на сите други јавни институции, стои СДСМ од Кавадарци. Тоа се оние луѓе или онаа политика која своевремено увезе 70 илјади гласачи од Косово за Бранко Црвенковски да стане претседател на Република Македонија, истакна Панов.

Тоа е, додаде, партијата која го донесе Законот за територијална поделба.

Панов, на оние што протестираат низ Кавадарци, а немаат, како што нагласи, изградено ништо, им порача да протестираат со добри идеи, не со уништување на она што оваа власт го изгради.