Бизнис
18. July 2017 - 19:39

МФ запиша хартии од вредност во висина од 10,6 милиони евра

Министерството за финансии на денешната аукција издаде државни хартии во вредност од 652 милиони денари или 10,6 милиони евра.

Сегашните камати за државни хартии од вредност, како што истакнуваат во денешното соопштение од Министерството,  се меѓу историски најниските и се движат од 1,45 отсто до 3,8 отсто во зависност од рочноста. Тие се двојно пониски во однос на каматата на старите долгови кои се сервисираат. За споредба, посочуваат од Министерството, каматата кон Дојче Банк изнесуваше 6,456 отсто.

Во соопштението се наведува дека во периодот од јуни до денеска, Министерството за финансии има вратено стари долгови во износ од 122,5 милиони евра. За овој период државниот долг е намален, а официјалните податоци за тоа колку изнесува истиот за вториот квартал од годинава ќе бидат објавени на веб-страната на Министерството за финансии на 31 јули 2017.

Од Министерството за финансии посочуваат дека во насока на транспарентноста во работата со јавните финансии редовно ќе ги информира граѓаните за средствата кои се позајмуваат, како и за нивната намена.

- Средствата кои досега беа повлечени беа искористени за враќање на доспеани, наследени долгови, но и за тековно финансирање на буџетот, се наведува во соопштението од Министерството за финансии.