Машинскиот факултет во Скопје ќе врши вештачење на лифтот во кој загина шестгодишното дете
Истрагата за несреќата која се случи вчера во Куманово а во која загина шестодишно дете продолжува.
Основното јавно обвинителство денес издаде наредба за вештачење на лифтот кое ќе се врши на Машинскиот факултет во Скопје и ќе треба да ги утврди причините за несреќата.
По наредба на надлежен јавен обвинител, лифтот е целосно изолиран и обезбеден со полициско присуство. Во исто време, обвинителот издаде наредба за одземање на севкупната документација од фирмата задолжена за сервисирање на лифтот, како и прибирање на друга неопходна документација потребна за расветлување на случајот.
Дополнително, уште во текот на вчерашниот ден издадена е наредба за обдукција на телото на починатото момче.
Соседите видно вознемирени од несреќата изјавија дека детето само се спуштало од шестиот кат и веројатно го заглавило рачето во лифтот , но не знаат да објаснат како дошло до смртните последици. Тие раскажуваат дека последните два месеца заштитната врата на лифтот не била во функција.
Инаку, зградата во која што живеело момчето е релативно нов станбен објект со приближно триесетина станови.
-
Драган Ивановски
Сите содржини од овој новинар