Македонија
10. December 2015 - 15:43

Македонската литература на Саемот на книга во Москва

Во рамки на 17. Меѓународен саем на интелектуалната книжевност Non/Fiction 2015 во Москва се одржа литературниот настан „Словенските средби“. Македонската литература ја претстави Олга Панкина со промоција на едицијата „Македонскиот роман на 21 век“.

Како автор на овој значаен проект за македонската култура, Панкина истакна дека тој успешно се реализира со поддршка на Министерството за култура, преку конкурсот за странски издавачи, во соработка со издавачката куќа „Центар за книга Рудомино“ при Серуската државна библиотека за странска литература.

На руски јазик веќе се објавени романите „Храпешко“ од Ермис Лафазановски (со слика од Сергеј Андреевски на корицата) 2014; „Водена пирамида“ од Луан Старова (со слика од Васко Ташковски) 2015 и „Дваесет и првиот“ од Томислав Османли (со слика од Илија Пенушлиски) октомври 2015.

Остварувањата на Олга Панкина, како што се наведува, придонесуваат за ширење и афирмација на македонските книжевни и ликовни вредности на големото руско јазично подрачје. 

На настанот присуствуваа дипломатски претставници од словенските држави, писатели, преведувачи, лингвисти и стручњаци по словенски јазици и литератури и читатели. Средбата ја водеше Јуриј Фридштејн, одговорен уредник на издавачката куќа „Центар за книга Рудомино“.