Балкан
7. December 2016 - 9:16

Коѕиас: Албанија може во ЕУ само под определени услови

Албанија ќе добие членство во ЕУ само под определени услови, се наведува во писмото-одговор на шефот на грчката дипломатија Никос Коѕиас до пратениците од опозициската партија Нова демократија, Дора Бакојани и Јанис Кефалојанис, а во врска со извештајот за напредокот на Албанија изготвен од Европската комисија и подготвеноста за почнување на пристапните преговори, пренесува весникот „Катимерини“. 

Актуелната влада во Атина нема намера да ги повтори грешките за Албанија, што ги дозволија претходните грчки влади, истакна првиот грчки дипломат.

- Ги уверувам пратениците дека за разлика од претходните грчки влади, во текот на чиј мандат Албанија влезе во НАТО, без компензации, и доби статус на земја кандидат за членство во ЕУ, без да ги исполни соодветните барања, а најмногу оние што се однесуваа на заштитата на правата на малцинствата, сегашната влада нема намера да ги повтори нивните грешки, посочи Никос Коѕиас во својот одговор до двајцата пратеници конзервативци од опозицијата.