Балкан
16. November 2017 - 8:49

Јункер: ЕК е подготвена да и помогне на Грција по поплавите

Европската комисија е подготвена да овозможи каква било помош за Грција по деструктивните поплави во западна Атика, изјави претседателот на ЕК, Жан Клод Јункер.

- Со жалење дознав дека многу луѓе ги изгубиле своите животи и своите најмили во смртоносните поплави што го зафатија централниот дел на Грција, наведува Јункер во соопштение и додава дека во име на целата Европска комисија сака да изрази солидарност со грчкиот народ и властите.
       
- Трагедијата во која било држава, наша членка е трагедија за цела Европа и подготвени сме да ја поддржиме Грција на кој било начин, додаде тој.

- Нашите инструменти за итна помош се во целост на располагање на грчките власти, истакна Јункер.

Во поплавите во близина на Атина загинаа 15, а повредени се 17 лица.

Според Генералниот секретаријат за цивилна заштита, меѓу загинатите се 10 мажи и пет жени, додека 11 мажи и шест жени се повредени.

Грчкиот премиер Алексис Ципрас прогласи национална жалост.

- Ова се многу тешки моменти за Грција. Преживуваме голема катастрофа, рече Ципрас во обраќањето до јавноста.

Тој наведе дека веднаш и без одложување ќе бидат усвоени мерки за поддршка за загрозените домаќинства и претпријатија.