Македонија
27. јуни 2017 - 9:05

Изложба на фотографии на Белопета во Љубљана

Изложба на фотографии насловена „Поради џезот“ на Оливер Белопета, директор на „Скопски џез фестивал“, ќе биде отворена денеска во Културниот и конгресен центар Цанкарјев дом во Љубљана.

Со неговата изложба на фотографии официјално ќе почне и 58-то издание на „Џез фестивал Љубљана“. Ова е прва негова изложба на фотографии воопшто. Неговата љубов кон фотографијата започнува токму со неговите први посети на џез фестивалот во Љубљана во седумдесеттите години од минатиот век. Во периодот од 2000-2004 година, тој беше и уметнички директор на фестивалот во Љубљана.

Триесетте фотографии кои ќе бидат претставени се избор од повеќе музички фестивали ширум светот - Европа, Африка, се до далечната Азија.

Куратор на изложбата е познатиот фотограф Жига Коритник, а воведниот текст за неа го напиша публицистот и музички критичар Ичо Видмар. Изложбата ќе биде отворена до 2 септември.