Функционери на МВР, правни и физички лица дел од истрагата на ОЈО за сомнежот за купување гласови од СДСМ

Се делеле пари, се условувале на вработувања, се делеле тендери за финансирање на партиската кампања- вакви изборни нерегуларности во Струмица, Куманово и Скопје истражуваат обвинителите за организиран криминал. Обвинителството преку соопштение информираше дека се во тек повеќе предистражни активности кои треба да расветлат случаи на незаконско финансирање кампања и поткуп на гласачи за изборите во 2014та и 2016та година. 

Вклучени биле и поранешни функционери на МВР како и лица и фирми од овие градови.

Постојат основи на сомнение дека лицата вршеле влијание врз начинот на гласањето преку различни форми за време на изборите, со што ги сториле кривичните дела, појаснуваат од Јавното обвинителство. 

Според неофицијалните информации од истрагата обвинителите работат на повеќе случаи кои се однесуваат на Социјал демократскиот сојуз. 

Сомнежот за незаконско постапување на СДСМ се однесува и на изборите во 2014 и на предвремените избори во 2016.

Неофицијално, истрагата се однесува на купување илјадници гласови. Потрошени биле стотици илјади евра.

Во март минатата година обвинбителите влегоа во општина Струмица и одземаа службени компјутери а на распит повикаа 10 лица вработени во општинската администрација. Тогаш обвинителството соопшти дека се истражува изборен поткуп за паламентарните и претседателстките избори во 2014.

Два дена по изборите на 11 декември полицијата изврши претрес во домот на началникот на СВР Куманово кој беше поставен од техничкиот министер Оливер Спасовски по наредба на обвинителството за оргаснизиран криминал. Сомненијата беа дека се вршел изборен поткуп со делење на дрва за огрев. Во Струмица беше регистриран случај на поткуп, а функционери од струмичката полиција, пред камери им симнуваа лисици на осомничените и ги ослободуваа.