Балкан
15. April 2017 - 9:09

Ердоган: Турција ќе ги преразгледа односите со Европа по референдумот

Турскиот претседател Реџеп Тајип Ердоган изјави дека заедно со претставници на Владата ќе ги разгледаат идните односи на земјата со Европа веднаш по референдумот за пошироки претседателски овластувања.

Тој за националната телевизија ТРТ истакна дека земјата кандидат за членство во ЕУ била принудена да чека неосновано.

- Турција не е нивно жртвено јагне. Сите ќе си знаат каде им е местото, нагласи Ердоган.

За време на кампањата пред одржувањето на референдумот, тој ги нарече некои европски лидери „фашисти“ и ги обвини дека се однесуваат како „нацисти“.

Турскиот министер за евроинтеграции Јомер Челик вчера, исто така, предложи по референдумот да се организира средба на високо ниво меѓу Турција и ЕУ, со цел да се разгледа иднината на меѓусебните односи.

Анкетите покажуваат дека на утрешниот референдум позитивно ќе се изјаснат околу 55 отсто од гласачите.